Ku wa kabiri II

AMASENGESHO YA MU GITONDO

Nyagasani bumbura umunwa wanjye
Maze ururimi rwanjye rutangaze hose igisingizo cyawe

Interuro itumira : Amaso twayahanze Yezu Kristu, tugane inzira y’urugamba.

ZABURI YA 94

1 Nimuze tuvugirize impundu Uhoraho,
turirimbe Urutare rudukiza ;
2 tumuhinguke imbere tumurata,
tumuririmbire ibisingizo.

3 Kuko Uhoraho ari Imana y’igihangange,
ni Umwami w’igihangange asumba imana zose.
4 Ni we ufashe imizi y’isi mu kiganza cye,
maze akagenga n’impinga z’imisozi.
5 Inyanja ni iye, ni we wayiremye,
n’ubutaka bwumutse bwabumbwe n’ibiganza bye.

6 Nimwinjire duhine umugongo twuname ;
dutere ivi imbere y’Uhoraho waturemye.
7 Kuko we ari Imana yacu,
naho twe tukaba imbaga yo mu rwuri rwe,
n’ubushyo buragiwe n’ikiganza cye.

Iyaba uyu munsi mwakundaga kumva ijwi rye !
8 “Ntimugundirize umutima wanyu nk’i Meriba,
nko ku munsi w’i Masa, mu butayu,
9 aho abasekuruzabanyu banyinjaga,
aho bangeragerezaga, n’ubwo bari barabonye ibikorwa byanjye.

10 Mu myaka mirongo ine nazinutswe iyo nyoko,
maze ndavuga nti” Ni imbaga y’umutima wararutse,
ntibazi amayira yanjye !”

INDIRIMBO

UMUGANI W’UMWANA W’IKIRARA
(Igitabo cy’umukristu, Y6)

R/ Ngirira impuhwe Mana, ngirira impuhwe,
Ku bicumuro byanjye ngirira impuhwe,
Nagiye kure yawe, ngirira impuhwe,
None ubu ndatarutse.

1. Umubyeyi yari afite abana babiri,
Umuto abwira se ati "mpa umunani",
Nuko Umwana amaze kuwushyikira,
Arawutagaguza.

2. Maze yigira mu gihugu cya kure,
Ni ko kwishimisha uko yishakiye,
Ibyo yajyanye byose bimushiranye,
Ahera ko agira inzara.

3. Ijya kwaka akazi ku muturage
Bamuhaye ako kuragira ingurube
Nuko umwana yumva ko ari mu makuba
Ni ko kwibwira ati :

4. Ubu ngiye gusubira kwa Data,
Nzamubwire nti "naracumuriye”,
Singikwiye kwitwa umwana wawe,
Ungire umugaragu."

Zaburiya 42. Urukumbuzi rw’ingoro

“Dawe ndashaka ko aho ndi, abo wampaye nabo tubana, kugira ngo babone ikuzo ryanjye wampaye”:Yh17,24

Inyikirizo : Ohereza urumuri n’ukuri kwawe kugira ngo biyobore intambwe zanjye.

1 Mana yanjye, ndenganura, +
unkiranure n’inyoko y’abagomeramana ;*
maze unkize abahendanyi n’abagome.

2 Mana yanjye, ko ari wowe mfiteho ubuhungiro, *
kuki usa n’uwanyihakanye ?
Kuki nagomba kugenda nijimye, *
umwanzi anshumbirije ?

3 Ohereza urumuri rwawe n’ukuri kwawe, *
bijye binyobora inzira,
maze bizangeze ku musozi wawe mutagatifu, *
aho Ingoro yawe yubatse.
4 Ubwo nzegera urutambiro rw’Imana, *
nsange Imana nkesha umunezero wose ;
maze, Uhoraho Mana yanjye, ngusingize, *
ngucurangira inanga.

5 Mbe mutima wanjye, ni iki kiguciye intege, *
kandi ukangiriramo amaganya ?
Izere Imana, kuko nzagumya kuyisingiza, *
yo mukiza wanjye n’Imana yanjye. Δ

Hubahwe Imana Data na Mwana na Roho Mutagatifu
Nk’uko bisanzwe iteka bubahwe ubu n’iteka ryose

Inyikirizo : Ohereza urumuri n’ukuri kwawe kugira ngo biyobore intambwe zanjye.

Igisingizo cya Hezekiyasi (Iz 38)

Agahinda k’ugiye gupfa n’ibyishimo by’uwongeye kubona ubuzima.

“Ni njye zuka n’ubugingo, unyemera n’aho yaba yarapfuye azabaho” : Yh11, 25

Inyikirizo : Nyagasani si Imana y’abapfuye ahubwo ni Imana y’abazima

10 Jyewe naribwiraga nti *
“Nari ncagashije iminsi y’ubugingo bwanjye,
none ngaha ngiye kwinjira mu marembo ajya ikuzimu, *
nzahaheranwe mu gihe cyose nari nshigaje kubaho.”

11 Naravugaga nti “Sinzabona Uhoraho ku isi y’abazima,*
no mu bantu batuye iyi isi sinzongera kurabukwa n’umwe.
12 Inzu yanjye irashenywe, ijugunywe kure yanjye, *
ak’ihema ry’abashumba.

Ngeze ku ndunduro y’ubuzima bwanjye,*
ak’umuboshyi umaze kuzuza umwenda,
akawuzingazinga amaze kuwutotoraho indodo zisagutse ;*
13 kuva mu gitondo kugeza nimugoroba waranyishe urahorahoza !

Ncura imiborogo ngeza mu kindi gitondo. +
Ak’intare ikocagura amagufwa ni na ko Amenagura ayanjye ; *
kuva mu gitondo kugeza nimugoroba akanyica, agahorahoza !

14 Dore ndajwigira kimwe n’intashya, nkaguguza nk’intungura,_
amaso yanjye arahondoberezwa no guhora ntumbiriye Ijuru.*
Nyagasani ndagowe, ngwino untabare.
15 Ubu se mvuge iki kindi,
Kandi byose ari We ubikora ?
Mu gihe cyose nzaba nkiriho
Umutima wanjye uzahora usobetse amaganya.
17 Ngaha ubujuganirwe bwanjye ubumpinduriyemo umunezero, +
ni wowe uzikuye amagara yanjye uyakura mu mva, *
n’ibyaha byanjye byose ubijugunya kure inyuma yawe.

18 Koko rero ikuzimu si ho haguha ikuzo, *
cyangwa se ngo urupfu rukwamamaze,
n’abamanukira mu rwobo,*
ntibaba bacyizeye ubudahemuka bwawe.
19 Umuzima, ni we wenyine ugusingiza,+
nk’uko nanjye uyu munsi mbigenje. *
Umubyeyi azamenyesha abana be ubudahemuka bwawe.

20 Uhoraho, ngwino untabare, +
maze mu gihe cyose tuzaba tukiriho, *
tuzacurangire inanga zacu mu Ngoro y’Uhoraho.

Hubahwe Imana Data na Mwana na Roho Mutagatifu
Nk’uko bisanzwe iteka bubahwe ubu n’iteka ryose

Inyikirizo : Nyagasani si Imana y’abapfuye ahubwo ni Imana y’abazima

Zaburi ya 64. Indirimbo yo gushimira Imana kubera ibyiza byayo.

“Ibiremwa byose birarekereje ngo birebe igaragazwa ry’abana b’Imana” : Rom 8, 19

Inyikirizo : Amakosa yacu arakabije, ariko Wowe urayadukize.

2 Mana iri i Siyoni, abantu bakwiye kugusingiza,*
kandi bakarangiza imihigo bakugiriye.

3 Wowe wumva isengesho bakubwiye,*
abantu bose baza bakugana.
4 Ibyaha bikunda kutuganza,*
ariko wowe ukabitubabarira.

5 Hahirwa umutumirwa wihitiyemo ubwawe ; *
ukamuha kwigumira mu bikari by’Ingoro yawe.
Tuzahazwa ibyiza byo mu rugo rwawe, *
ibintu bitagatifu byo mu Ngoro yawe.

6 Mu butungane bwawe, uratwumva ukadukorera ibitangaza, *
wowe, Mana Mukiza wacu,
mizero ya bose kugeza ku mpera z’isi, *
no ku batuye ibirwa byo mu nyanjya za kure cyane.

7 Ububasha bwawe bushyigikira imisozi, *
ugakindikiza ubutwari,
8 ugahosha urusaku rw’inyanjya, urusaku rw’imivumba yazo,*
ukanacubya imyivumbagatanyo y’ibihugu.

9 Ku nkiko z’isi baratangarira ibimenyetso werekana, *
ab’iburasirazuba n’iburengerazuba wabateye kuvuza impundu.

10 Wasuye isi, uyuhira amazi, *
maze uyigwizamo uburumbuke butagira ingano.
Imigezi y’Imana isendereye amazi, *
maze ugategurira abantu imyaka ibatunga.

Dore uko utegura ubutaka : *
11 uyobora amazi mu mayogi, ugasanza amasinde,
ukagusha imvura y’umurindi ngo ibworoshye, *
maze ugaha umugisha imbuto zimeramo.

12 Umwaka uwusoza uwuhunda ibyiza byawe, *
aho unyuze hose hagasigara uburumbuke buteye ubwuzu.

13 Ubwatsi bw’amatungo, buratohagira mu butayu,+
utununga ugasanga duteye ubwuzu, *
14 inzuri zikanyanyagiramo amashyo arisha,
n’imibande ikazimagizwa n’imyaka yeze. *
Nuko byose bigasabagizwa n’ibyishimo, bikaririmba.

Hubahwe Imana Data na Mwana na Roho Mutagatifu
Nk’uko bisanzwe iteka bubahwe ubu n’iteka ryose

Inyikirizo : Amakosa yacu arakabije, ariko Wowe urayadukize .

IJAMBO RY’IMANA Yow 2, 12 - 13
Icyumweru cya 1, 2, 3, 4. 44

Nimungarukire n’umutima wanyu wose, mwigomwe mu byo kurya, murire kandi muganye. Nimushishimure imitima yanyu, mureke ibyo mwambaye, maze mugarukire Uhoraho Imana yanyu, mureke ibyo mwambaye, maze mugarukire Uhoraho Imana.

R/ Mana Nyirubutagatifu nkiza,
* kuko nagucumuyeho.
V/ Mbabarira umpe kuva habi.
* Kuko nagucumuyeho
Hubahwe Imana Data. R/

IGISINGIZO CYA ZAKARIYA

Inyikirizo : Umwigisha wanyu ni umwe, ni Kristu Nyagasani uri mu Ijuru

68 Nihasingizwe Nyagasani Imana ya Israheli,
koko yasuye umuryango we kandi akawukiza

69 Yatugoboreye ububasha budukiza
mu nzu ya Dawudi umugaragu we

70 nk’uko abahanuzi be batagatifu
bari barabitumenyesheje kuva kera

71 ko azadukiza abanzi bacu,
akatugobotora mu nzara z’abatwanga bose.
72 Yagiriye impuhwe ababyeyi bacu
maze yibuka isezerano rye ritagatifu,

73 ya ndahiro yarahiriye Abrahamu umubyeyi wacu,
74 avuga ko namara kutugobotora mu maboko y’abanzi bacu,

azaduha kumukorera ntacyo twikanga,
75 turangwa n’ubuyoboke hamwe n’ubutungane,
iminsi yose y’ukubaho kwacu.

76 Nawe rero wa kana we, uzitwa
umuhanuzi w’umusumba byose,

kuko uzabanziriza Nyagasani ngo
umutegurire amayira,

77 ukamenyesha umuryango we umukiro,
bazakesha kubabarirwa ibyaha byabo.

78 Koko Imana yacu igira impuhwe zahebuje,
ari nazo zatumye Zuba-rirashe

amanuka mu ijuru aje kudusura,
79 akabonekera abari batuye mu mwijima

no mu gicuku cy’urupfu,
kugira ngo atuyobore mu nzira y’amahoro.

Inyikirizo : Umwigisha wanyu ni umwe, ni Kristu Nyagasani uri mu Ijuru

IBISINGIZO N’IBISABISHO

Icyumweru cya 2 n’icya 4

R/ Umva isengesho ry’umuryango wawe uje ugutakira.

Umva ijwi ry’abagutakira kubera ububabare, ari ubwa roho ari n’ubw’umubiri, n’abatakaje ukwizera.

Ongerera imbaraga abantu bose bita ku bavandimwe bababaye, kandi bakabafasha.

Rebana impuhwe abaharanira agaciro ka kiremwa muntu, n’abita ku batishoboye.

Ba hafi abantu bose baharanira amahoro bo bategura amaza y’ingoma yawe.

(Ibisabisho byihariye)
Dawe uri mu ijuru

Dusabe :

Nyagasani , ku bw’ubuntu bwawe budacogora, rinda Kiriziya yawe, kandi kuko muntu atagufite ntacyo yaba ari cyo, mufashe buri gihe kugendera kure ikibi maze ahugukire umukiro wawe
Ku bwa Yezu Kristu Umwana wawe n’Umwami wacu, Imana mubana mugategekana mu bumwe bwa Roho Mutagatifu, uko ibihe bihora bisimburana iteka. Amen